Alahady 15 Desambra 2019
Maro noho ny volon-dohako ny isan’izay mankahala ahy tsy ahoan-tsy ahoana... Ny latsa dia nanorotoro ny foko, ka reraka indrindra aho ; ary niandry antra aho, fa tsy nisy, sy mpanony, fa tsy nahita. Salamo 69:4, 20
Andro nampangorohoro, rehefa nanafina ny tavany Andriamanitra !
Andro nahamenatra sy nampisafotofoto,
Rehefa nisolo toerana anay Ianao, ry Tompo,
Nanefa ny sanda goavana ho fanavotana !
Nitady fitia sy fangorahana Ianao,
Nefa tsy nisy tamin’ireo olonao nahatakatra ny fijalianao ;
Ny iray namadika Anao, ary ny iray nandà Anao,
Tsy nahita mpampionona Ianao, na iray aza.
Tsy niloa-bava Ianao, tao anatin’ny fangirifirianao,
Rehefa nihantsy sy nanaraby Anao teo anatrehanao
Ireo fahavalonao naneso Anao ;
Koa dia nanorotoro ny fonao ny latsa.
Farany dia nisotro ilay kapoaka mangidy Ianao,
Namita ny asa, ka nilaza hoe : “Vita”,
Ry Mpandresy mahery ! Teo an-tanan’ny Ray,
Tam-piadanana feno, no natolotrao ny fanahinao.
Ry Mpamonjy malala, Ianao Izay any ambonin’ny anjely,
Dia nosatrohan’Andriamanitra haja, satria afa-po Izy ;
Dieny etỳ an-tany izahay dia efa midera Anao,
Ary miankohoka sy mitsaoka Anao, ry Tompo.